حمل کی ذیابیطس: خطرے کے عوامل، شوگر ٹیسٹ اور علاج

حمل کی ذیابیطس خون میں شوگر کا زیادہ ہونا ہے جو حمل کے دوران شروع ہوتا ہے۔ یہ عام طور پر پیدائش کے بعد ختم ہو جاتی ہے، لیکن اسے اچھی طرح قابو میں رکھنا ضروری ہے کیونکہ یہ آپ اور آپ کے بچے کے لیے مسائل پیدا کر سکتی ہے۔ یہاں بتایا گیا ہے کہ ٹیسٹ، علاج اور پیدائش کے بعد کے مہینوں میں کیا توقع رکھیں۔

یہ کیوں ہوتی ہے؟

حمل کے دوران آپ کے جسم کو زیادہ انسولین کی ضرورت ہوتی ہے، یہ وہ ہارمون ہے جو خون میں شوگر کو قابو میں رکھتا ہے۔ حمل کی ذیابیطس اس وقت ہوتی ہے جب آپ کا جسم ان اضافی ضروریات کو پورا کرنے کے لیے کافی انسولین نہیں بنا پاتا۔

یہ کسے ہونے کا زیادہ امکان ہے؟

• باڈی ماس انڈیکس (BMI) 30 سے زیادہ ہونا
• پچھلا بچہ جس کا وزن پیدائش کے وقت 4.5 kg (10 lb) یا اس سے زیادہ تھا
• پچھلے حمل میں حمل کی ذیابیطس ہونا
• والدین یا بہن بھائی میں سے کسی کو ذیابیطس ہونا
• جنوبی ایشیائی، سیاہ فام، افریقی کیریبین یا مشرقِ وسطیٰ سے خاندانی تعلق

حمل کی ذیابیطس والی بہت سی خواتین میں کوئی علامات نہیں ہوتیں، اسی لیے ٹیسٹ کروانا اہم ہے۔

شوگر ٹیسٹ

عام اسکریننگ ٹیسٹ منہ کے ذریعے گلوکوز برداشت کا ٹیسٹ، یعنی شوگر ٹیسٹ (OGTT) ہے۔ آپ خالی پیٹ رہتی ہیں، خون کا ٹیسٹ ہوتا ہے، پھر میٹھا مشروب پیتی ہیں اور تقریباً 2 گھنٹے بعد دوبارہ خون کا ٹیسٹ ہوتا ہے۔ یہ عام طور پر حمل کے 24 سے 28 ہفتوں کے درمیان کیا جاتا ہے۔ اگر آپ کو پہلے حمل کی ذیابیطس ہو چکی ہے تو عام طور پر آپ کا ٹیسٹ اس سے پہلے بھی کیا جائے گا۔

علاج

• گھر پر ٹیسٹ کرنے والی کٹ سے خود اپنے خون میں شوگر چیک کرنا، اکثر ناشتے سے پہلے اور کھانے کے 1 گھنٹے بعد
• کھانے پینے میں تبدیلیاں، جیسے میٹھی چیزیں اور میٹھے مشروبات کم کرنا، بہتر ہے کہ ماہرِ غذائیت کے مشورے سے
• باقاعدہ جسمانی سرگرمی، جیسے کھانے کے بعد چہل قدمی
• اگر غذا اور سرگرمی کافی نہ ہوں تو گولیاں یا انسولین کے انجکشن

قابو میں رکھنا کیوں ضروری ہے

خون میں شوگر اچھی طرح قابو میں ہو تو مسائل کا خطرہ کم ہو جاتا ہے، جیسے بچے کا بہت بڑا ہونا جس سے پیدائش مشکل ہو سکتی ہے، اور پیدائش کے بعد بچے میں خون کی شوگر کم ہونا یا یرقان۔ حمل کے دوران عام طور پر آپ کے اضافی معائنے اور اسکین ہوں گے۔

بچے کی پیدائش کے بعد

حمل کی ذیابیطس عام طور پر پیدائش کے بعد ختم ہو جاتی ہے، لیکن اس سے آگے چل کر زندگی میں ٹائپ 2 ذیابیطس کا خطرہ بڑھ جاتا ہے۔ برطانیہ میں پیدائش کے 6 سے 13 ہفتے بعد خون کا ٹیسٹ پیش کیا جاتا ہے، اور اگر نتیجہ نارمل ہو تو پھر سال میں ایک بار۔ اپنے ڈاکٹر سے پوچھیں کہ آپ کے علاقے میں کیا تجویز کیا جاتا ہے۔